YMA-in hmalak ho zel an rel

Hortoki Joint YMA leh Bairabi South Branch YMA hruaitute nimin (3.12.2024) a thukhawm chuan Bairabi leh Hortoki inkar Tlawng Lui dung humhalh tura hmalak ho zel an rel.

Bairabi leh Hortoki inkar Tlawng Lui dungah hnamdang ILP nei loa hnathawk thahnem tak an awm tih sawiin Hortoki Joint YMA leh Bairabi South Branch YMA, 'Tlawng Luia nungchate nasa taka an suasam bakah luikam ramngaw leh nungchate nasa takin an ti chereu tel. Tlawng lui a nungcha leh Tlawng kam ramngawte a chhiat zel loh nan chak taka hmalak ho zel nise,' an ti.

Tlawng kam thing leh mau chu lui dung zawhin lawngleng hmangin nitin a sang tel an la tih sawiin Hortoki Joint YMA leh Bairabi South Branch YMA chuan, Mizoram pawnah an tawlh chhuak thin a, mipui leh sorkarin hlawkna engmah an hmuh loh avangin mumal zawk a thing leh maute hi enkawl emaw, hralh dan awm se an duh.

Hortoki leh Bairabi khaw mipui thenkhat ten khawpui lam mi leh phai lam mi dan phal loa sangha man tura an kalpui thin thu hriat a ni chu pawi tiin Hortoki Joint YMA leh Bairabi South Branch YMA hruaitute chuan, 'a lo ti thinte chu tun hnuah chuan ti tawh lo tur leh fimkhur tawh turin an hriattir a ni. 

Hortoki Joint YMA leh Bairabi South Branch YMA hruaitute chuan YMA chuan hnamdang zalen taka chhawr a, huan/lo ram enkawl tura chhawrtute chu hriat an nih avangin an hlawhfa dahte tha taka enkawlin, thlah zalen lo turin an hriattir a, an thuchhuah ngai pawimawh loa ti lui an awm a nih chuan a tul anga action lak an tum.