Chhiahtlanga in an thiah sak

National Highway-54 laih zauh leh siamthat hna thawh mekah Chhiahtlang khuaa ram lak tawha in pakhat la thiah loh chu nimin (10.7.2025) khan khawl hmanga thiah sak an ni.

Lenkawl Editor Zonuna Kawlni hnen atanga Bengvarna thudawn danin, Serchhip District paltlangtu NH. 54, tuna NH-02 tih tak laihzauh leh siamthat hna thawh mekah hian sawrkarin kawngpui zauhna atana ram a mamawhah dan anga ram laa zangnadawmnate a pek hnuah Chhiahtlang Kawn Veng-a cheng Hmangaihsangzualite chuan zangnadawmna an lak chu a dik lo leh tlem lutuk nia hriain an in chu an thiat duh lo a ni.

July 4, 2025 khan an in hi thiat tura sawrkarin hma laa khawlte nen an thawhchhuah hnuah in neitute hi court-ah an kal tak avangin court chuan in thiah sak tura hmalakna kal mek chu a ti khawtlai a ni.

Amaherawhchu, June 25, 2025 khan stay order hi tihtawp niin in hi senghawi tura chawlhkar hnih hun pek an nih hnuah nimin khan Serchhip-a Executive Magistrate te kaihhruaina hnuaiah in thiah sak an ni ta a ni.