Khaw eng zahna a tlem ta lutuk - CYMA Vice President

Maubawk Branch YMA chuan nizan (38.4.2023) khan YMA kumpuan 'Ram leh Hnam Humhalh' hawnna hun an hmang a, kumpuan hawngtu Central YMA Vice President Lalhmachhuana chuan kan khawtlangah khaw eng zahna a tlem tak thu a sawi.

Lalhmachhuana chuan kan khawtlangah khaw eng zahna a tlemta lutuk nia sawiin, 'Biak in chhung erawh chuan kan la zah viau. Khawlai hmun hrang hrang erawh kan zah ta lo, kawng sir leh mi tamna hmuna lo inchiu duh tawk kan tam ta hle mai. Inenfiaha siam that ngai kan la nei ngah hle a ni. Thil dik lo nia kan hriatte kan la tlangau pui hram hram avangte hian kan hnam hi a la tlu lo mai mai a ni,' a ti.

CYMA Vice President chuan hnathawh thuamhnaw haa thlantlaa hlawh hmu ai chuan smart taka mibum ching kan ngaisang nia sawiin, 'Hengte hi kan sim a hun tawh hle a ni. Mizote chu hnam thuawih leh hruai nuam kan ni,' tiin system tha tak a awm chuan kan zui hreh loh thu a sawi.

Mizo zingah nun lem nei kan tam thu sawiin Lalhmachhuana chuan, 'A dik em tih pawh ngaihtuah hman lovin hlawk kan tum a, hei hi chhiahpuam khan a ti lang chiang hle. Hlawkna kan duh avangin a dik leh dik loh kan ngaihtuah hman lo a, hlawkna kan duh avangin midangin tuar mahse pawi kan ti tawh lo. Hei hian kan khawtlang nun hona a tichhia a, thlantlaa hnathawh ai chuan dik vak lova sum lak luh kan duh tawh zawk a, hei hi siamtha tur chuan ram leh hnam humhalh kan tih hian a huam tel vek a ni. Mi tlemte ten an tih hram hramna avangin kan hnam hi tundinin a la awm a, a la tlusawp lo mai mai a ni," a ti.