ZPM-in an Leader an chhan

ZPM chuan thuchhuah siamin, tunhnaiah an party leader Lalduhoma chu MNF-in thudik lo leh belhchiandawl lo hmangin an bei nasa hle tih an tarlang a, 'ZPM Leader hi an bei duh a nih pawhin rinthu leh thudik lo ni loin, thudik leh belhchiandawl ni thei se ZPM chuan kan duh. Kristian rama hetiang politics tawp leh bawlhhlawh tak chhawm nuna a awm zel tur hi ZPM chuan kan phal lo a ni,' an ti.

MNF-in politics tuinu, hmana an lo hlawhtlinpui tawh thin ang kha rawn tharthawh leh tum lo se an duh tih tarlangin ZPM chuan, 'Khawvel a thang zel a, tunah chuan mi an fing tawh a, engkim awlsam taka haichhuah zung zung theih tawhna hun, kum 2023 a ni tawh tih hre reng turin MNF hi kan chah a ni,' tiin kum 2018-a an intiamnaah tihhlawhtlin mumal sawi tur an neih loh vang leh kumin 2023 inthlan lo awm turah policy leh manifesto sawi tur an neih tak loh avanga ZPM Leader chungah an tuan ta nia an ngaih thu an tarlang.

Ram tana an hmachhawp te, ram tana a tihtum te pawh sawi ngam tawh lo khawpa kum 5 chhung ram an lo kaihhruai rah MNF-in an tel mek nia tarlangin ZPM chuan, 'An chhuanlam ber Covid lah chhuanlam tling a nih lohzia mipuiin an hrethiam tawh. Vbc. 3000 dawn Covid avanga sum hmuh tur hmu kim lo anga an insawi thin chu, fiah taka hailan sak niin, Covid chhuanlama kan sum hmuh loh an sawi ziah vbc. 2636.52 leh kan dawn belh zat vbc. 2563.17 inthlauhna hi vbc. 73.35 chauh a lo ni. Heng zingah hian a bungrua leh hmanrua ang zawng a kan dawn leh Mizoram mipui, tlawmngai pawl hrang hrang leh kohhrante thawhkhawm a la tel lo cheu. Vawiin thlengin khawi state mah hian keini angin covid hi chhuanlamah an hmang tawh lo,' an ti.