MZP-in lungchhiat thlak an ti

MZP Executive Committee vawiin (24.4.2024)-a an office-a thukhawm chuan an zirlaipui vawi tam tak pawngsual a ni chu lungchhiatthlak an ti.

MZP chuan, 'Chanchinthara lo lang Champhai District-a kan zirlaipui vawi tam tak pawngsual a ni chu lungchhiatthlak kan ti hle. Pawi khawihtu nia puh Saitawna leh a fapa Vanlalmawiate chu an phu ang tawk hremna pe turin thuneitute kan ngen nghal a ni,' tiin hetiang thil  hi thleng nawn tawh lo se MZP chuan a duh thu an tarlang.

Hetiang thil duhawm lo tak hun rei tak chhung hriatchhuah loh, hai chhuaktu an zirtirtunu chu MZP chuan a chhuang takzet.

Tarlan tawh angin, Champhai Police-te chuan Champhai District khaw pakhata hmeichhe naupang pawngsualtua puh pafa an man a, jail-ah dah an ni tawh. 

Thulaknain a tarlan danin, pawngsualtua puhte hi Saitawna (53) leh a fapa Vanlalmawia (23) te an ni. Hmeichhe naupang sawi danin, Saitawna hian kum 4 mi a nih laiin a serh a khawisak thin a, kum 9 mi a nihlaiin Vanlalmawia hian a pawngsual thung. Chumi hnu atang chuan an pafa hian an pawngsual fo. 

Hmeichhe naupang hian a sawi chhuak ngai loa, sikula an zirtirtunuin an thil tawn tawh leh an chunga thil thleng midang hnena an la sawi chhuah loh a hnena sawi duh an neihte ziaka a hnena thlen turin a ti a, hmeichhe naupang hian a thil tawn hi a ziak a ni. 

Zirtirtu hian a zirchian hnuah FIR thehluh an tum a, hmeichhe naupang hian class X a exam zawh law lawa thehluh a duh thung. Class X exam zawhah hmeichhe naupang pa hian Champhai Police Station-ah FIR thehlutin, Saitawnate pafa hi man an ni a, jail-ah dah an ni tawh. An thubuai court-in a ngaihtuah mek.