British Army-ah Mizo 29

Nimin (24.4.2024) khan Isaac Vanrosanga, Sergeant leh Lalremtluanga Ralte, Corporal, British Army, Infantry Division a thawk mekte chuan Chief Minister Lalduhoma a office-ah an kawm a, MYC Chairman Malsawmzuala'n a hruai. 

Mizo tlangval British Army-te leh Chief Minister hian Mizo thalai tam zawkten British Army an luh theih dan tur an sawihoa, a lut duh Mizo thalai te tana kawng lo buatsaih turin Mizoram Youth Commission chuan hma lo la se, an ti.

An dilna leh an Visa buaipuisak bakah interview hmachhawn thei khawpa tling leh tlakte chu an kalna tur sum, awlsam taka loan an lak theihna tur thlenga buaipuisak tha an ti.

British Army-te hian an training laiin chhiah pek vek hnuah cheng nuai 1.6 vel an hlawh a, an training chhungin an kalna senso hi awlsam takin an rul vek thei niin a tang mekte hian an sawi. 

Tunah hian Mizo thalai mi 29 te British Army-ah hian an awm mek. Anni hote nena tangkawp hian MYC kaltlangin Mizoram sorkar chuan thalai tam zawk te British Armya luhtir an tum dawn a ni. Thalai, hetiang lama tuiten MYC hmalakna lo ngaichan tur a ni. 

Qualification chu Class 12 a ni a, online cognitive test an neih hnuah an kohte chuan English, Maths, Medical, Physical leh interview an hmachhawn a ngai. San zawng leh rih zawngah bithliah a awm loa, bldy mass index hmangin an teh thung.