Naupang lung endik sak
admin 25-Apr-2024 06:05 PMNational Health Mission hnuaia programme pawimawh tak, Rastrya Bal Swasthya Karyakram (RBSK) leh Ebenezer Medical Centre-te thawhhonain vawiin (25.4.2024) hian naupang lung natna neite tan Congenital Heart Disease Screening Camp, Ebenezer Medical Centre, Chawnpui, Aizawlah neih a ni.
RBSK leh Ebenezer Medical Centre-te hian January 25, 2024 khan thawhhona thuthlung an ziak fel a, hemi bawh zui hian vawiinah screening camp hi buatsaih a ni ta a ni. Screening samp-a naupang lung enkawl ngai thlan chhuahte hi Ebenezer Medical Centre-ah enkawl an ni anga, an inenkawlna sensote hi RBSK, NHM, Mizoram chuan a tumsak dawn a ni.
Screening camp-ah hian nau piang hlim atanga kum 18 inkar lung lama harsatna nei, veng leh khaw hrang hrang atanga naupang lo kalte nilengin en an ni. He thu buatsaih a nih lai thlengin lung lama harsatna nei naupang 186 echo screening tihsak an ni tawh. Registration ti hi an la awm zel bawk a ni.
RBSK puihna in vawiin thleng hian naupang 90 chuang lung zai ngaite hospital bill RBSK chuan a lo tumsak tawh. RBSK hian kum liamta lamah khan state pawn hospital-te nen tangkawpin screening camp tum 5 lai a lo buatsaih tawh a ni.
Ebenezer Medical Centre chuan hun hmasa lamah pawh nasa takin RBSK hi a lo pui tawh thin. State pawn Bangalore leh Imphal lama RBSK puihna a naupang lung zai tawhte pawh anni hian an lo enkawl chhunzawmsak thin.