Missionary Retreat a tiak dawn

Ni 11.7.2024 (Ningani) zan atanga Bawngkawn Presbyterian Kohhran Biak Ina neih tan North East Region Missionary Retreat vawi 5-na chu zanin (14.7.2024) hian a tiak dawn. 

Kumin retreat hi hmarchhak biala missionary-te leh an chhungte tana buatsaih a ni a, retreat-ah hian thupui atan 'Chanchin Tha Hril' (Matthaia 28 : 19 & 20) tih hman a ni. Ni 12.7.2024 nilengin missionary leh an kawppuite tan paper zirho buatsaih a ni a, chawhmaah Upa Dr C Lalhrekima buatsaih 'Mental & Physical Health Awareness' tih thupui zir ho a ni a, chawhnu lamah 'Tunlai North East India-a rawngbawl dan tur' tih thupui hmangin Rev. Dr. Lalrinkima, ATC buatsaih zirho a ni thung.

Ni 13.7.2024 nilengin testimony sawi leh fakna inkhawm a hun hman a ni a, Inrinni zan atanga Pathianni chawhnu thlengin  retreat thupui 'Chanchin Tha hril' tih thupui then hrang hrang ngaihthlak a ni. Missionary thawk lai boral mi 4-te sunna hun Pathianni chawhnuah hman a ni.

NE Region Missionary Retreat ah hian North East field pasarih atangin Pathianni chawhma thleng khan missionary 710 inziak lut an awm. An chhungte nena missionary Bawngkawna riak lut zat chu mi 947 an ni.