Tlabung maxi cab-te'n din tintuah

Tlabung leh Lunglei inkara tlan maxi cab neitu intelkhawm - Tlabung Maxi Cab Welfare-te'n karleh Thawhlehni (14.8.2024) aṭang hian kawng dinhmun avangin an service titawpa tiam chin awm loa din an rel.

Tlabung Post atanga Bengvarna thudawn danin, tun hnaia Tlabung Maxi Cab Welfare ṭhutkhawmnaah, tunlaia kawng dinhmun vanga lirthei tlanten harsatna an tawh chungchang an sawi a, an service chu hlawkpui aia sum leh pai an chân phah zawk thu, sawilan a ni.

Tlabung leh Lunglei inkar pawh nileng deuhthawa tlan a ngai leh ṭan niin an sawi a, National Highway 302 chu tun aia zawh nuam deuh zawk tura thawm ṭhat a nih hma chuan tlan chhunzawm loa din an rel. 

Tlabung Maxi Cab Welfare hruaitute chuan, an service titawpa din an tum nachhan chu lungawi lohna lantir tum vang ngawr ngawr ni hran loin, an lirtheiin a tawrh loh zawkna tura ruahmanna a nih thu an sawi.

Tun dinhmunah Tlabung leh Lunglei inkarah hian maxi cab service 32 vel a awm mek a, tun dinhmunah maxi cab tih loh khualzin leh bungraw phura tlan lirthei dang a awm lo.

Tun hnai khan Maxi Cab lam hian kawng dinhmun avangin chuan man tihsân an tum a, nimahsela Tlabung Joint Action Committee lamin an pawmpui theih loh avangin chuan man ngai an hman chhunzawm.