MZP-te an pungkhawm

Vawiin (August 21,2024) chawhma dar 9 khan, Borapansury khua-a Chakma-in Mizo Police pahnih an sawisaknaa mawhphurhtute case siam sak phutin, Chakma MLA pahnihte chenna kawtah MZP an pungkhawm. 

Nimina MZP General Headquarters Executive Committee thukhawm chuan, Borapansury khuaa Mizo Police pahnihte sawisaa, kutthlaktu Chakma-te chu case siam saka, an phu tawk hremna pe ngei turin sawrkar a lo ngen tawh. MZP ngenna anga hmalakna a awm mai loh avangin, MZP chuan Chakma pawn chhuah a khap a ni. 

Chakma-te pawn chhuah khapna chu zawm a nih leh nih loh enfiah turin, tukin khan MZP chuan hnatlang a ko a, Chakma House, Hunthar leh Chakma MLA pahnihte chenna Legislator Home Tuikhuahtlang kawtahte punkhawm a ni.

Hemi chungchangah Home Minister K. Sapdanga'n MZP hruaitute leng tura a sawm angin, nizan khan Home Minister chu a chenna inah hmuh a ni. MZP duhdan sawipui niin, vawiin chhun dar 12 khan punkhawmna hmunah Vanlalmawia, Home Secretary; DIG (Northern Range) H Ramthlengliana IPS leh Police hotute nen MZP duhdan hrang hrangte sawiho leh a ni. 

Home Department hotute leh Police hotute chuan, MZP duhdan anga hmalak mek a nih thu leh, hemi chungchangah FIR pawh a luh tawh thu an sawi a. Chhui chian mek a nih thu leh thiltisual tute case siamsak ngei an tum thu an sawi avangin MZP chuan punkhawm hi an titawp rih. Ngun taka sawrkar hmalak dan MZP chuan a enzui zel dawn. 

Pungkhawmte chuan, hetiang hian resolution an siam:-

1. Borapansury-a thil thleng chungchângah FIR thehluh niin, registrar tawh a ni a. Chak taka bawhzui tur leh a mawhphurhtu misual te na taka hrem turin MZP chuan sawrkar a ngen a ni. 

2. Mizoram Sawrkar-in a mi leh sa sawisak a nih chungchangah, misualte chet dan hi Magisterial Enquiry la ngei se kan duh a. Misualte rang takin chhui chhuak se, hremna pe ngei rawhse.