Petrol a vang tawh hle

National Highway No. 6 kawngpuia Kawnpui leh Sairang inkar a chhiat avanga  Mizoram Oil Tanker Driver Association (MOTDA) leh Petroleum Entrepreneurs’ and Transporters’ Union of Mizoram (PETUM) ten September 17, 2024 atanga petrol phurh an chawlhsan avangin, Kolasib District tih loah chuan tuialhthei a van tawh bakah, a black-a zuarte'n an ti to tawh hle.

MOTDA leh PETUM-in petrol an phur dawn lo tih thawm a rik hnuah petrol pump hrang hrang a lun nghal hle a, petrol lak tum thui tak tak an intlar thin. Petrol pump tam zawkin mipui hnena hralh tur an nei tawh loa, nei an awm chuan pantu an thahnem thin hle. Petrol la tur hian thui tak tak intlar a ngai thin. 

Pump thenkhatah chuan coupon neite pawh an pe thei tawh loa, sorkar atanga permit neite bak an pe thei tawh lo.

Hetihlai hian petrol van hlim chuan a black-a zuarte'n a hma-a an zawrh thin angin petrol an hralh chhuak a, tunah chuan a man pawh a hma aiin a to tawh. Chu bakah petrol black-a zuar thin eng emaw zat chuan hralh tur an nei tawh lo. A la neite chuan mineral water Rs. 20 man khat lo Rs. 100 vela an zawrh thin kha hmun thenkhatah chuan Rs. 150 a zuarte pawh an awm tawh.

Petrol lei tur a vang leh mipui tana hralh tur nei petrol pump-a la tura intlar a ngaih thui em avangin black-a petrol zuarte hi an lun hle a, an kawl rei hman meuh lo.