MNF-in campaign an kick off

Vawiin (15.10.2024) hian Sinlung Hills Council General Election pualin MNF chuan khaw hrang hrangah campaign kick-off an nei a. Sakawrdai-a Campaign Kick-off a hmanpuinaah Leader of Opposition Lalchhandama Ralte, MNF Vice President chuan thu sawiin, 'ZPM hian state-ah sorkar mah se, chhung tin thleng phak thiltih engmah an nei lo. Thil eng eng emaw zuarin, eng ang policy pawh duangin mipui lakah intiamna hrang hrang nei ṭhin mah se, pawisa an nei lo, mipui bum nan an sawi mai mai a ni. Party dangin thlêmna chi tinreng hmangin an la rawn thlêm dâwn che u. Tu emaw dâwt sawi vânga buai tûr kan ni lo, sorkar thla 10 lek kan la hrawn chhûng hian kan ti ang an ti engmah an ti lo, kan ti lo ang an tih ang zêlin an ti zâwk a ni. Helaiah rawn inzuarin, itawm takin awm mah se, kan hmuh tawh, mita kan hmuh, benga kan hriat hmang hian thutlukna i siam ang u,' a ti. 

Lalchhandama Ralte chuan ZPM-in thu tam tak an sawi tur thu sawiin, 'Hmar tlangdung hmangaih berten an insawi ang a, MNF ram leh hnam hmangaih lote pawh an rawn ti ang. Mah se, in hmu vek, sorkar tam tak kan hrawn tawh alawm, hmar thimpui tih ṭhin kha MNF kan sorkar khan eng kan hmu ṭan a, kan eng telh telh a, zirna lamah emaw, kawng chi kimin hmalam kan pan tawh a nih hi. Tunah kan hmasawnna ṭhuanṭhu leh mêk hian rilru a tina a ni,' tiin SHC inthlan lo awm tûrah hian MNF chu a dawt leha sorkar leh mai tûr a ni tih hria a, lo titling ngei tûrin a ngen.