Saitual Bawrhsapin kawng a enfiah

Vawiin (15.10.2024) chhun khan Saitual Bawrhsap Dr. Lalngura Tlau chuan NHIDCL kawng laih mekin a paltlang Keifang kawngpui sira in leh lo nei eng emaw zat, laih remti lote a hmunah a enfiah. Heng zingah hian compensation lak tur zata lungawi lo te, compensation la tawh in la ṭhiat lo te, sawrkar ram (road reserved)a in sa te, kawngpuiin a sut loh tura ngaih, tel leh site an tel a ni.

Bawrhsap chuan mahni ram /in hmun lo ram (LSC) chinte chiang taka enfiaha, hrechiang ṭhin turin mipuite a chah a, 'Compensation chungchanga buaina tam ber chu an ram area an hriat chian tawk loh vang a ni. Kawngpui a ṭhat chuan ram a changkang,' tiin hmasawnna chak taka a kal theih nan harsatna siam lo turin mipuite a chah.

Sorkar thuchhuah tarlan danin, khaw chhung a in sa tam tak te’n sawrkar ram kawngpui (road reserved) lam nekin pillar phunna aṭanga kawngpui lam nek zelin in hi sak a ni tlangpui a, hei hi a chhan ni bera lang chu LSC rules and regulation ah road reserved inziak hriat chian loh thin vang a ni. 

Highway chungchanga buaina tam zawk chu in leh lo rei tak lo din tawh te’n mahni ram emaw ti a road reserved-a in sa an nih ṭhin avangin sawrkar lam hotute leh mipuite inkarah harsatna lo awm ta thin a ni.

Vawiina Saitual Bawrhsapin a enfiah hnu hian NHIDCL lam chuan hna chhunzawm leh nghalin khawchhung kawngpuite pawh khawih zui nghal a ni.