P&E Dept.-in an minister thlavang an hauh

Powe & Electricity Department officer leh staff-te chuan an minister F Rodingliana laka Assam Rifle-te chetdan chungchangah thuchhuah an siam a, ngaihdam dil turin Assam Rifles an phut.

P&E Department chuan, 'Mizoram Sawrkar hna pawimawh thawk leh hlenchhuak tura zinchhuak, kan minister zahawm tak Pu F Rodingliana leh amah zuitu official-ten, October 12 (Inrinni) 2024 tlai dar 4:00 velah Kawlbem khua an lut tur chu, 2nd Battalion Assam Rifle ten khaw daia check gate an siamah zurui chungin an lo tiding mai ni loin, mawilo takin an motor bang an bensakte leh, an hmingte zawta an hun hlu tak an lo tihkhawtlaisak hi kan minister leh Mizoram mipui zah lohnaah kan ngai,' an ti.

Assam Rifle Post Commander-in a naute chetdan mawi lo tak avanga P&E Minister zahawm tak hnenah ngaihdam a dilna chu P&E Minister zahawm takin a ngaihdam mai bakah, state minister chunga an tih atana dik lo leh tul lote dawhthei leh tha taka a la hrilhfiah thei nia tarlangin P&E Department chuan, 'Kan minister hi kan chhuang tak zet. Assam Rifle-te ngaihdam dilna tha taka ngaihdam saka an inkalsan tawh hnuah, kan minister zahawm tak leh amah zuitu ten Ngopa atanga Champhai an pan leh tur chu, October 14 (Thawhtanni) 2024 zing 6:15 velah Ngopa khawdai petrol pump bulah Assam Rifle-ten tihdin an lo tum,' tiin Mizoram mipui te tham lohna leh zah lohnaah an ngai tih an tarlang.

P&E Department chuan  Champhai atanga Aizawl an pan mek laiin, October ni 17 (Ningani) 2024 chawhnu dar 1:00 velah Aizawl thlen hma lawk Bung Bangla leh Berawlui inkar kawngpuiah 2nd Battalion Assam Rifle Captain hoin ralthuam nena rikrap taka an lo tiding leh a hun hlu tak an lo tihkhawtlaisak duh leh zelte chu an hrethiam lo takzet tih tarlangin, 'Mizoram state minister zahawm tak leh, kan department enkawltu ni bawk, mipuiten kan aiawha kan thlan leh kan ram hruaitu minister zahawm tak a nih tlat avangin, a chunga Assam Rifle-te chet dan hi Mizo mipui zah lohna leh tham lohna ah kan ngai tlat a ni,' an ti.

An minister chunga thil thleng duhawm lo tak avangin Assam Rifles hotuten Mizoram Sorkar leh an minister zahawm tak hnenah ziakin ngaihdam dilna thlen ngei turin Assam Rifle-te an phut tlat tih tarlangin P&E Department chuan, 'Hetiang thil duhawm lo thlen tirtu Assam Rifle official-te chungah dan angin Ministry of Home Affairs, Govt. of India in action la zui nghal ngei turin kan phut tlat bawk a ni. Tin, tun hnuah hetiang thil duhawm lo hi tu chungah mah thleng nawn tawhlo se kan duh tak zet a ni,' tiin an minister thlavang an hauh tlat zel tur thu an tarlang.

File Picture