Lungawi lohna lantir chhan tur sawifiah

Mizoram Consumer Vehicle Union (MCVU) chuan vawiin (22.10.2024) hian Aizawl Press Club-ah press conference neiin, oil man tih to avang leh kawng chhia avanga naktuka lungawi lohna lantirna atana an lirtheite dintir an tum chhan an sawifiah. 

MCVU hruaitute chuan a tirah chuan lungawi lohna hi tiamchin awm loa lantir an tum thu sawiin, YMA Rorel Inkhawm leh kohhran hrang hrang inkhawmpui dawn avanga ngenna kan dawn avangin ni khat atan kan pawi tawi, an ti.

MCVU PRESS STATEMENT

Mizoram Commercial Vehicle Union (MCVU)-in oil man sang leh kawng chhe nasa lutuk avanga loh theih loh a lungawi lohna kan lantirin Dt.23.10.2024 hian servive lovin kan ding dawn a, YMA rorel inkhawmpui a awm dawn avang leh Kohhran Inkhawmpui programme te a lo awm avangin ni khat din ni se kan ti a. Hetianga lungawi lohna lantir a ngai tur hi a pawi kan ti hle a, lungawi lohna kan lantir tur chhan hi Zoram mipui hriatah puan a tulin kan hria a, a thehdarh kawngah theihtawpa min tanpui turin Chanchinbu mite kan ngen che u a ni.

1. Kawng chhia: Mitinin kan hriat angina Mizoram pumah inkalpawhna kawng a chhe em em vek a, Aizawl khaw chhung pawh a chhiat ber tum tih hial a ni. Phai atanga kan chak lakna kawngpui tlan hleih theih loh khawpin a chhia a. Tin, Mizoram chhunga inkalpawhna kawng a chhe em em vek a, kan lirtheiin a tuara, a tuartu ber chu mipui an ni. Ruahtui tlak tam vang chu ni pakhat mah se sorkar inthlahdah vang niin kan hria a, kan lungawi lo a ni.

2. Oil man sang leh chhiah: Mizoram sorkar chuan petrol leh diesel man tipungin chhiah a la ta a, a punna hi petrol-ah Rs.5.56 niin diesel-ah Rs.7.76-in a pung ta a ni. Chhiah lak leh oil man tihpun hi kan do lo va, amaherawhchu vawi leh khata a pung vak mai hi kan hrethiam lo va, thil man zawng zawng a tihto tur leh mipuia a nghawng turte thlirin, Chief Minister pawh vawi thum lai kan hmu a ni. Central YMA telna NGO Coordination Committee-in diesel leh petrol man hi Rs.3.00 ve vea dil hniam theih an inrin avang leh, an thu leh hla ngaichang tura min ngen avangin kan hun tiam kan tawlh ta zawk a ni.

3. A hun kan ti lo: Mizoram pumah kawng a chhia a, lirtheia eizawngtute min nghawng na em em a, kawng chhiaah kan motor a tangin a tlu a, inhnuhchhuah nan leh motor chhe siam nan cheng tam tak kan seng a, lirthei tam tak phei chu hmun tam takah an service thei lo hial a ni. Chutiang dinhmun harsaa kan din mek laia sorkarin oil man a tisang vak mai hi a hun kan ti lo a ni.

4. Mipuite kan ngenna: Oil man to hian lirtheia eizawngte chauh a nghawng lo va. chhungkaw tin min nghawng a ni. Oil man a to chuan bungraw phurh man a sang lo thei lo va, in sakna bungrua leh ei leh bar phurh man a sang dawn. Hemi ngaihtuah chunga lungawi lohna lantir kan ni tih min hriatpui a, min thlawp turin mipuite kan ngen a ni.