Khawtlangin document hren sak

Vawi tam tak an ngen hnuah BRN Infrastructure Pvt. Ltd.-ten kawngpui an siamthat duh loh avangin nimin (21.10.2024) khan Theiriat khawtlang hruaituten an lirthei man sakin, a document an hren sak. 

Lunglei atanga thudawn danin, Theiriat khawtlang hruaituten vawi tamtak an ngen hnuah pawh National Highway No 302 kawngpui siamtu BRN Infrastructure Pvt. Ltd.-te'n  Three Gate leh Hrangchalkawn inkar kawng chu lirthei zawh theiha an siam duh loh avangin nimin khan Theiriat khawtlang hruaitute leh thalaite chu BRN Construction thuneitute hmuh tumin an thawk chhuak a, an lirthei pakhat chu man sakin, Company thuneitute nen thu delhkilh neia an inrem hnuah lirthei hi pe letin, a document an hren sak a ni. 

Theiriat khawtlang hruaitute chuan NH 302 kawngpuiin a huam chin, Three Gate leh Hrangchalkawn inkar kawng chu a siamtu Company BRN Infrastructurw Pvt Ltd te chuan hun eng emaw chen atangin an khawih chhunzawm lo tih an sawi, 'Hemi avang hian lirthei tan zawh hleihtheih loh khawpin a chhia. Tunhnaiah pawh motor lian buhfai phurte chuan an buhfai phurh an thlauh phah nual,' an ti. 

Kawng siamtu company hnenah Theiriat khawtlang hruaitute chuan vawi 10 chuan siamtha tura an ngen tawh thu sawiin, 'BRN Infrastructure thuneitute bakah kawngpui siam meka mawhphurtu NHIDCL thuneitute pawh vawi tamtak kan hmuh tawh. Amaherawhchu, inkawk kualin, an inpuh kual thin,' tiin Theiriat mai bakah Mizo mipui, helai kawng hmangtu tamtakin harsatna nasa tak an tawh thu an sawi.