Kum 10 chuang hnuah Blue Corn

Music video hnuhnung ber an tihchhuahna pawh kum 10 chuang a ni tawh mah se, tun hnaiah an inhmukhawm thei hlauh a, chu hun remchang chu chuhin music video thar an buaipui chuk chuk a, an tichhuak hnai e.

Mizo hmeichhe group hlawhtling ber tia chhal ngam 'Blue Corn' member pathum - Felicia, Tlingi leh Kim Kimi te chuan tun hnai khan music video an buaipui a.

Blue Corn music video thar title tur hi 'Luah Loh Zun' tih a ni. He hla hi hla thar tia sawi tur ni chiah lo mah se, Mizo hmeichhe group tan chuan hla thar tia sawi theih tur a ni. A hla hi Kim Kimi phuah niin, kum thum kalta kha solo angin, lyrics video angin YouTube-ah a dah chhuak a. Mahse, chang hnih leh a thunawn chauh a ni thung a. Blue Corn anga sak turin an record dawn ni tukah a chang thumna hi a phuah belh leh hnuah, an pathum chuan recording hi an buaipui thei ta a ni.

An music video buaipui chungchangah Kim Kimi chuan, "Hmun hrang hranga kan awm darh tawh avangin inhmuhkhawm a harsa tawh. Mahse, chhangchhe chung chungin tun tuma kan inhmukhawm chu hla kan record leh hman hlauh a. Feli te hi March-ah London atangin an lo haw nnachungin, September ah daih kan record thei hlauh a, kan vannei hle," a ti. 

Blue Corn hian kum 2005 khan an debut album 'Lunglawm A Kim' an tichhuak a, khatih laia album hralh kal ber zing ami a ni phak. Hemi hnu hian lengzem Krismas album hit zet mai, 'Krismas Nang Nen' tih chu kum 2006 khan an tichhuak leh a ni.

Hmeichhe pathum awmna group hian Blue Corn anga an music video tihchhuah hnuhnung ber chu 'Min Hlan Ve Ta Che' tih kha a ni. Chu chu kum 2012 daih tawh khan a ni. Hemi hnu hian Mizoram pawnah te an awm darh avang leh chhungkaw lam thil avanga an buai tawh avangin tihho an harsat tawh hle.

Tunah hian, Felicia hi a pasal fanau te nen London-ah an inbengbel mek a. Kum 2013 atang khan Kim Kimi pawh eizawnna avangin Bengaluru-ah a awm reng a. Tlingi erawh a pasal fanau te nen Mizoramah an awm thung.