Mana Motors-in Thar Roxx an tlangzarh

Nizan (September 19, 2024) khan an Showroom, Bawngkawnah Dealer Principal Dr Franklin Lalrinngheta leh David Sapzova'n an khuh hawng a, petrol leh diesel engine hmanga siam niin chi hrang pasarih a awm a, two wheel drive bikah a tlawm ber Rs 14,62,460 (on-road) a nih laiin a man to ber lei tur tan Rs 22,64,355 sen a ngai dawn thung.

Mizo zinga Thar ngaina David Sapzova chuan : "Thar-in hma a sawn hle a, a man hu leh a thil neih leh chhawm chi hrang hrang aṭangin Thar Roxx hi a tha hle a ni. A chhunga chuangte himna a pawimawh a, chumi kawngah chuan a tha em em," a ti.

October 2, 2010 khan kawng chhiaa tlan chi lirthei siam kawnga hriat hlawh Mahindra-in Thar hmasa ber a tichhuak a; August 15, 2020 khan kawngka pathum neiin chhuan hnihna a tichhuak leh a, India rama Sport Utility Vehicle tha 10 zinga chhiar tel a ni. 

Kum li hnu Independence Day-ah bawk India rama hralh chhuah turin kawngka panga nei Thar Roxx tlangzarh a ni a, thla khat leh ni li hnuah Mizoramah pho chhuah a ni ve thung. Company lamin October 3 aṭang chauhin booking hawng turin hriattir mah se, tlangzarh a nih thlengin Mana Motors chuan lei duh mi 200 vel an chhinchhiah tawh tih an sawi.

Dr Marina chuan dealership an hawn tirh 2013-ah Mana Motors-in tê reuh têin bul an tan tih a sawi a, anmahni dawrtu leh duhsaktute avangin India hmar chhak dealer zinga lian ber pawl an ni tawh tih sawi bawkin, lirthei an tlangzarh tawhah Thar Roxx-in a tiphur hle a ni.

"Kawngka pathum a nei tih chauh lovah chuan Thar hmasa kha miten an duhin tha an ti a. Tunah kawngka panga neiin a lo chhuak thar a, khaw laia tlanpui ila mi mit fukna tur a ni a, zinpui ila chhungkuaa nuam taka chuan theihna a ni tel a, kawng chhiaa buai ve lo tur a ni bawk," a ti.

Tunlai car inelna ber pakhat a chhung lam tihchangkan leh nuam tura thuam kawngah belhchian dawl tura thuam a ni a, a chung zau taka a hawn theih bakah chet sualna lakah a khalhtute vengna tha tak pek a ni a, level 2 ADAS hmanga thuam a ni.

Khawpui lailia tlanpui nuam tur leh Thar nihnain a ken tel kawng chhiaa hman tlak leh chak ṭha tak tura duan a ni a; chutih laiin diesel engine hmang automatic chauh four wheel drive-a siam a ni a, a dang zawng two-wheel drive a ni ve thung.

Petrol engine-in TGDi mStallion 2.0 litre hmangin gear paruk a nei a, gear thlak chawp ngaiah fuat (torque) newton meter (Nm) 330 leh brake horse power (bhp) 160-a chak a pe chhuak thei a; gear thlak chawp ngai lo automatic-ah Nm 380 thleng fuat neiin bhp 175 a pe chhuak thei bawk.

Diesel engine-in mHawk 2.2 litre hmangin gear paruk tho a nei a, gear thlak chawp ngaiah fuat Nm 330 leh bhp 150 -a chak a pe chhuak thei a; gear thlak chawp ngai lo automatic-ah Nm 370 thleng fuat neiin bhp 172 a pe chhuak thei bawk.