Gas home delivery sawiho

Nimin (19.11.2024) khan Aizawl DC Conference Hall-ah Aizawl DC  Lalhriatpuia kaihhruaiin Aizawl District Consumer Protection Council Meeting neih a ni a, Aizawl khawpui chhunga LPG home delivery chungchang sawiho a ni.

Meeting-ah hian sorkar ruahman anga eirawngbawlna gas chu home delivery kalpui chhoh mek zel dan sawihoin, gas agency hrang hrangte hmalak dan leh an dinhmun thlirho a ni.

Aizawl khawpui chhung veng hrang hranga fully leh partially a LPG home delivery kalpuina hmunte enho niin, Zothan Indane - Agency chuan an huamchhung veng tin 100% in home delivery an kalpui vek tawh thu an report. 

AMC area huamchhunga distributor tin chuan kum 2025 January thla atang chuan an area chhungah tuna home delivery an kalpui mekna bakah veng dang pahnih theuhah home delivery an kalpui belh leh ngei tur a ni tiin, an kalpuina belhna tur veng pahnih theuh thlan tir an ni.

Home delivery la kalpui lohna veng a awmte tan pawhin home delivery an book thei a, an lo book a nih chuan gas agency-ten an pe ngei ngei tur a ni.

Hmalakna vil zui turin meeting-ah hian Addl DC P.C Zonuntluangi kaihruai Monitoring Committee din nghal a ni. He committee hian gas agency hrang hrangten home delivery an kalpui dan a tul angin an endik thin ang.