Selinga in tihchhiat sawifiah

NH-06 Aizawl Ditsrict huam chhunga kawng siamna atana ram lak chungchang buaipuitu Compensation and Land Acquisition (CALA) for NH-06, Aizawl District chuan nimin (19.11.2024) a Selinga in thiah chungchangah a hnuai a mi ang hian thuchhuah a siam:

1) Compensation latu hming hi Sawihara c/o Laltluangkimi tiin Deputy Commissioner's Office record-ah hian tarlan a ni.

2) Competent Authority for Land Acquisition (CALA) chuan Rs.8,25,268 hi Sawihara hnena hlan turin a peih (ready) sa tawh a, mahse ani hian an in-hnuai (basement) chhût kim loh ni a sawiin compensation hi a la duh lo a ni. Sawihara dilna angin assessment pawh lak that a ni a, Rs. 12,38,091 in chhút chhuahsak a ni.

3) Sawihara assessment leh mi dang 41 assessment tharte hi DC Office/CALA chuan NHIDCL hnenah a thawn a (vide Memo No.14011/290/2023- DC(A)/L&B/177-180 dated 28th July, 2023). DC Office-in theih tawpa a chhuahpui latin NHIDCL hian Sawihara in leh lo assessment thar leh mi dang 41 assessment te hi NHIDCL hian a lo hnâwl vek a ni (vide Memo No.NHIDCL/PMU-Seling/2023- 24/NH-06/S-D/LA/1041 dated 5th January, 2024).

4) Hetiang a nih avang hian ram neitute hian an an in leh lo an chhuahsan duh loh avangin NHIDCL hian kawng zauh hna an thawk thei lo a, an harsatna hi Empowered Committee meeting October 17, 2024-a neihah NHIDCL hian a thlen. Empowered Committee hian ram leh in laih chhiat ngai awm eng emaw zat chu hmalak a ngaih thu leh hemi chungchang hi Arbitrator hian ching fel se a ti bawk. Hemi bawhzui zel hian section 3E of National Highway Act, 1956 angin CALA office chuan hma a la ta a ni.

5) The National Highways Act, 1956 under section 3D/3E-in a tarlan angin sorkar hian he ramah hian thuneihna pumhlum a nei tawh a ni.

6) National Highway Project hrang hrang hi Union Minister, MoRTH, Govt. of India-in hmalak dan hi ngawrh takin state tina mite chu a bawhzui thin. NH Project NH-54 leh NH-06-ah te hian hmun tam taka harsatna a thlen avang leh hna chak tawk loh avangin a duh khawp lo hle a ni.

7) Sawihara hi vawi tam tak a in leh lo zangnadawmna pawisa chhût chhuah tawh sa chu la a, insawn chhuak tura ngen a ni tawh thin. Arbitrator-in CALA hnena ram khawih loh tura a tihna stay order pawh a hlīp tawh a ni. Notice hi Sawihara hnenah hian vawi hnih (2) pêk tawh a ni a (June 26, 2024 leh October 27, 2024), chhanna hi ram neitu ațanga hmuh a ni lo.