Bana Kaih atan inremna ziak

Chief Minister Lalduhoma hmaah vawiin (18.12.2024) chawhma khan CM Conference Hall-ah Bana Kaih Scheme hnuaia progress partner-te loan pekna atan Mizoram Sorkar leh partner banks State Bank of India (SBI), Mizoram Rural Bank (MRB) Ieh Mizoram Co-operative Apex Bank Ltd. (MCAB) te chuan inremna (memorandum of agreement) an ziak. 

Lalduhoma chuan, 'Bana Kaih Scheme chu a takin kan lo kalpui dawn ta. Bank-te nena thawh dun ngai a nih angin kan thawhpui tur bank-te nena inremna kan ziak thei ta hi kan hlim hle. Mizoram tana ni chhinchhiahtlak, hmasawnna kawng dik min zawhtirtu hmalakna a nih ngei kan beisei,' a ti.

Inremna ziah zawhah Chief Minister Lalduhoma chuan Chief Minister's Bana Kaih Innovation Challenge a hawng nghal.

Chief Minister Bana Kaih Innovation Challenge hnuaiah hian intihsiakna hrang hrang a awm dawn a, chungte chu: 

* Department Innovation Challenge: Sawrkar department hrang hrangten project pakhat theuh rawn theh chhuakin intihsiakna neih tur a ni. 

* District Innovation Challenge : Mizoram district zawng zawngten DC kaihhruaina hnuaia neih tur a ni. Tah hian NGOs, LC/VC, Self-Help Group (SHGs), Primary Agricultural Credit Societies (PACS) te leh society anga in register zawng zawngte an tel thei dawn a ni. 

* Higher Educational Institutes' Local Immersion Challenge: Mizoram sawkar hnuaia college-te, Central Sawrkar nuaia college-te leh private college-te he challenge-ah hian an tel thei a ni. Khaw hrang hrangah zirlaite kalin an riak anga, an khaw kalnate'n harsatna an tawhte zirchiangin, chhawk zangkhai theih dan an ngaihtuahsak ang.

* Inventor's Challenge: Ngaihtuahna thar seng a, thil tha leh tangkai duang chhuak turte tan he intihsiakna hi buatsaih a ni. Thil thar/tih dan thar (innovation) a ni tur a ni a, Mizoram tana danglamna thlen duhte tan a tel theih vek a ni. Heng intihsiaknaah hian a titha zual bikte thlang chhuakin, lawmman siamsak an ni ang.