HM hoin CYMA leh kohhran thalai thukhawm

Vawiin (19.12.2024) chhun khan Home Minister K Sapdanga hoin a office-ah official, kohhran hrang hrang thalai hruaitute leh Central YMA aiawhte an thukhawm a, joint statement an siam.

Joint statment (A ngai ngaiin)

Vawiina dt.19.12.2024 (Thursday) hian Pu K.Sapdanga, Home Minister, Mizoram kaihhruiana in Home Depart a hotute, District Magistrate Aizawl leh Central YMA a hruaitute leh Kohhran hrang hranga Thalai Pawl Hruaitute chuan kumin 2024 a Sorkarin Halpuah leh Halmawi khapna a kalpui chungchangah inkawm hona neih a ni a.

He inkawm hona ah hian Halpuah leh Halmawi in hriselna a thalo zawnga a nghawng nasat thu leh a tul lo a sum leh pai khawhralna a nih thu te sawi a ni a. Halpuah leh Halmawi khapna chungchanga Sorkar hmalakna hrang hrangte sawi ho ni in Khapna Thupek bawhchhiate man an nih dan leh an laka dan ang hmalak chhunzawm a nih dan te sawi a ni bawk a. Hemi bakah hian Central YMA in tihtak zeta Halpuah leh Halmawi khapna a hlawhtlin theih nan a hma a lak dan leh ruahmanna kalpui turte sawilan a ni bawk.

Vawiina kalkhawmte hian Sorkarin Halpuah leh Halmawi khapna a kalpui hi a tha kan ti in hlawhtling ngei se kan ti a. Halpuah leh Halmawi khapna a hlawhtlin theih nan thahnem ngai leh lungrual taka hmalak ho zel kan tum a ni.