K Vena'n Parliament-ah thu a sawi

Vawiin (10.3.2025) a Parliament Budget Session-ah Rajya Sabha MP K Vanlalvena chuan NIT Mizoramin hun rei tak atanga harsatna a tawh chung chang a sawi chhuak.

K Vanlalvena chuan Mizoram NIT chu India Sawrkarin kum 2009 a NIT a din thar 10 zinga pakhat a nih thu te, a tirah chuan VNIT Nagpur atanga bul tan a nih thute leh July 2011 ah Mizorama sawn luh a nih thu te a sawi chhuak a, 'Din tirh a nih atanga tun thlengin mahni puala building la nei loin hmun hrang hrang Durtlang,Chaltlang leh Tanhrilahte mimal building luah a la ngai,' a ti.

NIT Mizoram chuan building sa tura an inbuatsaih tan laiin NIT ram Lengpui chu Riverine Reserved Forest chhung a mi a ni tiin Forest Department atangin complaint a luh thu leh NIT chu sum tam tham tak chawi tura Forest Dept.-in an phut avanga harsatna tawk an nih thu pawh Rajya Sabha MP chuan a sawi chhuak.

K Vanlalvena chuan harsatna sutkian sak tura Union Minister of Forest and Climate Change Bhupendra Yadav a hnena a ngennate tihhlawhtlin a nih avanga lawm thu sawiin, NIT Mizoramin Forest Dept hnena pawisa kan chawi tur zat chu nasa taka tih hniam ni tawh mah se, Mizoram sum harsatna hriat saka a bo a bang awm lova nuai bo sak turin Sorkar Laipui a ngen.