Opposition MLA-te tel loin bill pass
admin 10-Mar-2025 06:57 PMVawiin (10.3.2025) Assembly Session-ah Excise & Narcotics Minister Lalnghinglova Hmar putluh 'The Mizoram Liquor (Prohibition) Amendment Bill, 2025' chu opposition MLA-te tel loin pass a ni.
Opposition MLA-te chuan zu khap bur an duh laia zu zawrhna tur bilh luh a nih avang leh Excise Department-te'n phalna neite hnena zu an hralh theihna tur a tel avangin an pawmpui theih loh sawiin, bill pass pui loin House an chhuah san.
Chief Minister Lalduhoma chuan opposition MLA-te an chhuak chu pawi a tih thu sawiin, 'An chhuah chhan ber hi zu khap natna ber Mosolman ram pawhin an hotel, foreign dignataries leh tourist-te tana mi tlemte special permit an pek ang kha zu zawrh phalnaah min puh luih sak tlat a ni,' a ti.
Lalduhoma chuan an hrilhfiah chung pawhin opposition MLA-te'n an awih sak duh loh tih sawiin, Zoram mipuite chuan an pawmpui theih ngei a beisei thu a sawi.
Bill pass takin a tum ber chu Mizoram chhunga thar chhuah grape chauh ni lo dragon fruit, lakhuihthei, kawlthei, sunhlu, balhla etc. hmanga wine leh beer siam phal a ni. State pawn atanga beer, zu leh wine lakluh chu khap chhunzawm a ni dawn.
Hetihlai hian Excise Commissioner hnen atanga phalna nei tourist leh foreign dignitaries te chuan zu an rawn pai luh phal a ni dawn a, an pai an kham loh chuan Excise Commissioner Office-ah an lei thei ang. An zu lei tur hi Excise-in an man khawm atangin a ni.
Hriselna dinhmun avanga medical practitioner-te'n zu in tura an tihte chu 'red card' pek an ni dawn a, anni pawh hian Excise Commissioner Office-ah zu hi an lei thei ang.
