YMA-te hmala chhunzawm zel turin sawm

YMA Tuiphai Group chuan nizan (3.4.2025) khan S Chawngtuiah inkhawmpui vawi 34-na an hmang a, an hun hmanpuitu South Tuipui Bialtu MLA Jeje Lalpekhlua chuan ruihhlo tawlhruk avangin sum thianghlim lo a tam phah thu a sawi.,

Jeje Lalpekhlua chuan 'YMA chu tanpui ngaite tanpuitu kan nih angin, kan branch huam chhunga tanpui ngaite, theih ang tawka tanpui chhunzawm zel a pawimawh. YMA thil tum pathum, hunawl hman that, Zofate hmasawnna tur ngaihtuah leh, Kristian nundan tha ngaihsan-te hi kan chhawm nun zel a pawimawh a ni,' a ti.

Ruihhlo avangin thalai tam tak an buai mek tih sawiin South Tuipui Bialtu MLA chuan, 'Ruihhlo tawlhruk avangin sum thianghlim lo a tam phah. Branch hrang hrangte'n ruihhlo do kawnga hma an lo lak tawhna a lawmawm hle,' tiin tun aia nasaa hma la chhunzawm zel turin a sawm nghal.

Jeje-a chuan Kristian rama cheng tih hriat loh khawpin kan ramah tualthah leh rukruk thawm hriat tur a awm reng tawh tih sawiin, 'Nunau tan pawh a thlamuan thlak tawh lo takzet. Kan thalai zingah ruihhlo-in a tih buai, khawlai a damdawi leh zurui hmuh tur an tam em em tawh. aupang zawkte'n aia upa zahna kan tlachham tulh tulh. Politics huang chhungah thu belhchian dawl lo hmangin kan inbei nasa thin em em a, heng zawng zawng ngaihtuah hian, Kristian nun dan thain kan nung em tih kan in zawh nawn fo a pawimawh takzet,' a ti.

YMA Tuiphai Group huam chhung ah hian khaw hrang hrang Bualpui H, Thingsai, Ngharchhip, New Ngharchhip, Cherhlun, Khawhri, Tarpho leh S. Chawngtui te an awm a ni.