MZP-in Chief Minister an kawm

MZP General Headquarters hruaitute chuan vawiin (15.4.2025) tlai dar 4:30 khan Lalduhoma, Chief Minister chu a pisa-ah hmuin, Phuldungsei, Mamit District-a Tripura Sawrkar hmalakna, raltlan chungchang leh pawl chhung thil pawimawh hrang hrangte an sawipui.

Raltlan chungchangah MZP chuan, ' Tu emaw political game vanga kan unau raltlante ngaih theih lohna social media a lian chho em em chu MZP chuan pawi a ti hle. Chutih rualin raltlante chhinchhiah ngei chu ngaiin kan hria,' tiin  thil ti sual leh dan loa chete hriatchhuah zung zungna tur chhinchhiahna fel fai tak chu a rang lama kalpui vat turin Chief Minister an ngen.

MZP chuan, Aizawl Post chanchinbuin a ni 13 & 14 chhuak a 'Phuldungsei ram chhungah Tripura in hnathawk' tih bawhzuiin Chief Minister hnenah hian an thlen a, Thaidawr tlang hi Mizoram leh Tripura ram inchuhna hmun niin, October 16, 2020 khan District Magistrate, Mamit District in Prohibitory Order chhuahin, thuchhuahah hian mi 5 emaw a aia tam punkhawm khap a lo ni tawh tih sawiin, helai hmun hi a rang lama sawrkar in ngaihven tur leh Tripura sawrkar hmalakna hi tih tawp tir turin Chief Minister leh Home Minister ngen nghal an ni.

MZP chuan kumin June ni 30, 2025 hian, MZP bultumin 'Remna Ni' chu Lammual-ah ropui taka hman tum a ni tih tarlangin, he hunah hian remna leh muanna hlutzia hre reng chungin Mizo mipuite he hunah hian tel vek turin an sawm.