CSS hnuaia thawk mi 10,654 an awm

Nimin (15.4.2025) a Chief Secretary charge la mektu H Lalengmawia'n press conference a neih tuma a sawi danin, Mizoram Sorkar hnuaiah centrally sponsored scheme (CSS) hnuaiah thawktu mi 10,654 an awm. 

CSS hnuaia thawktu awm zat hi state sorkar hnuaia deparment hrang hrangten an implement CSS hrang hrang hnuaia thawktute zirchiang tura Study Group din a nih tuma an zirchianna anga tarlan a ni. Study Group hi ni 16.8.2021 khan din a ni a, ni 27.1.2023 khan Study Group report/recommendation chu Council of Minister-in a lo ngaihtuah daih tawh. Chuvangin, tuna CSS hnuaia thawk zat tak nen chuan a danglam deuh ang.

CSS hnuaia thawktu ngah ber department chu Education an ni a, thawktu 5312 an awm a, a dawttu chu Health niin thawktu 2590 an awm. Thawktu nei tlem ber department Home-ah chuan pakhat chiah a awm.

Department danga thawktu awm dan chu - Rural Development-ah 1382, Environment & Forest-ah 562, Social Welfare-ah 331, Agriculture-ah 136, Higher & Technical-ah 108, UD&PA-ah 97, LAD-ah 58, Law & Judicial-ah 24, AH & Vety-ah 18, Revenue-ah 8, PHE-ah 5 leh Irrigation-ah 3.