CYMA fimkhur turin ngen
admin 30-Apr-2025 10:34 AMNgur Village Council leh NGO-te chuan thuchhuah siamin, Central YMA -in April 24, 2025 a Central Anti Drug Squad (CADS) ten heroin hawng 400 an man neitua rin Lalhmingmawia (Mawia) Ngur khua nia an hriat thu an chhuah chu, thu dik lo a nih thu an tarlang.
Lalhmingmawia (Mawia) hi Ngur khua ni loin Khawmawi (Myanmar) khua a ni a ni tih tarlangin Ngur VC leh NGO-te chuan, 'Amah pawh hi man loin tunah hian an khua Khawmawiah a awm nia hriat a ni. Lalhmingmawia (Mawia) hi Ngur khaw mi a ni loa, damdawi No. 4 an man sak pawh hi Ngur khua/ram atanga a lak a ni lo tih Mizoram mipuiten min hriat sak turin kan duh che u a ni,' a ti.
Ngur VC leh NGO-te chuan, 'Hetianga Khaw hmingchhiatna thleng thei thilah finfiahna pawh awm loa thu chhuah awm hi Ngur VC leh NGO hrang hrang kal khawmte chuan pawi kan tiin kan duh lo hle. CYMA pawh tihdikna siam tura ngen a nih hnuah vawiin ni thlenga tih dikna kan la hmu lo hi kan hrethiam lo hle a ni,' tiin tun hnuah khaw hmingchhiatna thleng thei laka thu chhuah kawngah CYMA pawh fimkhur tura an ngen nghal thu an tarlang.
