ZGN-in unau hmel hai awm thin pawi ti

Khawvel puma Zofate insuihkhawmna tura hmalatu pawl, Zofa Global Network (ZGN) chuan nimin (30.4.2025) khan Tourist Lodge, Chaltlang-ah 'Zofa Global Convention' an hmang a, Adviser to CM Lalmuanpuia Punte-in a hmanpui.

He hunah hian ZGN Chapter hrang hrang, Manipur, Shillong leh Champhai aţangin palai eng emaw zat an rawn tel a, Mizoram-a NGO hrang hrang leh hnam pual zirlai pawl hrang hrangin pawhin an telpui.

Lalmuanpuia Punte chuan thu sawiin, 'Thu belhchian dawl lo hmanga raltlante beihna a nasa. Zirchiannaah Mizorama thilsual khawihtu zingah raltlan pawh ni kher loin, Myanmar mi hrim hrim hi 5% chauh an awm. Buaina thleng a awmin fimkhur taka thuchiang hriat kan tum a ngai. Hetianga raltlante puhna hian Zofate/Zohnahthlak inpumkhatna atan harsatna a siam nasa hle,' a ti.

Zofa Global Convention hi ZGN inkhawmpui lian leh rorelna sang ber a ni a, 2nd Session-ah rorelin, resolution pahnih an pass.

1. Zofa hnam hrang hrang zingah unau hmelhai a awm leh ţhin hi a pawi kan ti tak zet. Khawvel mithmuha hnam anga kan dinchhuah theih nan Zofa hnam hrang hrangte inngeih dial dialin, thukhat vuain i insuihkhawm ang u.

2. Social media-a unau leh unau rilru tina thei thuziak leh thusawi lakah fimkhur tlang ţheuh turin Zofa zawng zawngte kan ngen a ni.