Pakistan PM a in hrosa

India-in Pakistan-a inkhuar firfiakte'n Pahalgam-a India mi 25 leh Nepali mi 1 an thah phuba lakna atana Pakistan leh Pakistan awp Kashmir hmuna firfiakte inkhuarna hmun pakua missile hmanga beih hnuah Pakistan Prime Minister Shehbaz Sharif chu a in hrosa nasa hle.

India lamin hmun kua missile hmanga an kah thu a tarlan laiin, Pakistan Prime Minister chuan hmun nga niin a tarlang a, 'He inkahna hi Pakistan chuan a theihna zawng zawngin a chhanglet ang. Hetianga rapthlak taka chetna hi hrem lohin kan chhuah dawn lo. Kan ram pum chu kan armed force-te kiangah lungrual takin kan ring reng. Kan ngaihtuahna leh tawngtainate chu kan officer leh sipai huaisen tak takte kiangah a awm,' a ti.

Shehbaz Sharif chuan Pakistan mipuite leh an force-te chu an hmelmate dolet tura an inbuatsaih thu sawiin, an hmelmate chu an thil tum tenawm tak an tih hlawhtlin tir ngai dawn loh thu pawh a sawi.