Mistiri-te'n thuchhuah an siam

Mizoram Mistiri Association (MMA) chuan thuchhuah siamin, Mizoram chhunga khaw hrang hranga mistiri-te daily rate chungchangah khaw thenkhat VC-ten an khaw chhunga mistiri ni khat hlawh (daily rate) bi tukin Rs. 700-750 aia sanga thawk lo turin thu chhuah an siam ṭhin tih an hriat thu an sawi.

MMA chuan Mizoram Sawrkarin a hna thawkte hlawh bi a siam hian mistiri (carpenter) a chhawr dawnin skill I category, group C level-a dah an ni tih tarlangin, 'Labour Department hnuaia con-struction works minimum wages rate mila rawih an ni thin. Minimum Wages Committee-in rate hniam ber (minimum) aia hniama chhawr loh tur tih a ni. He committte-ah hian MMA pawh hi telh kan ni. LESDE-in April 1, 2023-a notification a chhuah ang chuan skill I hian Rs. 730 aia hniam a hlawh tur a ni lo. Sawrkarin a chhawr hian mistiri chuan kut ruakin a thawk chhuak mai thin,' an ti.

Sawrkarin a chhawr anga thawk thei an ni lo tih tarlangin MMA chuan, 'A hmanrua (tools) kan intum vek thin avangin MMA General Assembly 2018-a thu pass chuan mistiri ni khat hlawh hi Rs. 800 (minimum) ni se kan ti. Hmanrua eng kim a intum vek tur a ni tih a ni. Hetiang hian mistiri chuan thawk thin tur leh khawtlang hruaitute pawhin min lo hriatpuia an khaw chhunga mistiri-te hlawh chungchangah MMA duh anga lo rem tihsak turin kan ngen a ni. Thil man to zel leh hmaraw man to zel avang tein mistiri Rs 800 aia hniam hlawh tura VC thenkhat thu chhuah hi kan pawm thei lo,' tiin mistiri chu a thiamna leh a hmanraw hman dan azira Rs. 800 aia sanga an chhawr thei a nih chuan an inbiak remna a nih tur thu an tarlang.