Pathianin kawng min hawn sakah ka ngai - Sailova

Dampa Bial MLA by-election lo awm tura ZPM candidate tur Vanlalsailova chuan Pathianin kawng a hawn  sakah a ngaihthu sawiin, 'Bialtu zahawm tak Pu Lalrintluanga Sailo-in min kalsan ta hi ka ui tak zet a, a kalsan tak a chhungte hnenah tawrhpuina ka hlan nawn leh a ni,' a ti.

Kum 2023 inthlanpuiah ka tling zo ta tih sawiin, 'Theih tawpa vil zui duh mah ila Party Headquarters thu chhuak awiha ZPM taka bial vil a rem si lo. Chuti chung chung chuan kum 2028 inthlan awm leh atan ka inbuatsaih sauh sauh reng tho a ni. Beisei leh rin aia hmaa inthlan hmachhawn a ngai ta hi a pawi a, Pu Rintluanga’n hmangaih taka a lo enkawl tawh a bial kalsan tak hi, kei pawhin duat leh tha taka enkawl zui thei turin ka tan Pathianin kawng min hawn sakah ka ngai,' tiin ruling bial lo ni tawh thin kha, kum khat leh thla riat chhung lek opposition bial an ni chunga hrehawm an tihzia kha hre turin Dampa Bial mipuite a chah.

Vanlalsailova chuan ruling bial nih zui theihna hun remchang lo inher chhuak leh ta tih sawiin, 'Llungrual taka bial hmangaihna nen min lo thlawp vek turin Dampa Bial mipuite pawh ka sawm nghal che u a ni. Politics leh sorkarah chuan ruling bial nih hi a hlu a, opposition MLA-te tih theih loh chin tam tak a awm avangin bialin hmasawnna tluantling neih theih nan sorkar lai kan tlin ngei pawh a ngai tak zet a ni. Kan hma lawkah inthlanna kan hmachhawn mai dawn a, bial chhulchhuak leh in unaupa tan hian tun ṭum chu duhsakna min hlan turin ka ngen a che u,' a ti.