Mizo sipai huaisen HM-in lawmpuina a hlan

India rama sipai huaisen chawimawina sang ber dawttu Kirti Award dawng tura thlan Mizo tlangval Captain Lalrinawma Sailo, Chanmari Veng, Aizawl leh an team-te chu vawiin (27.8.2025) hian Union Home Minister Amit Shah-in lawmpuina a hlan.

April 22, 2025-a Pahalgam, J&K ah hel pathumin khualzin 26 an that a, mi 20 an hliam hnuah India Sorkar chuan Operation Mahadev vuahin a beilet hna an thawk. He operation-ah hian Captain Lalrinawma Sailo hi a hotute zing mi niin, ramhnuai chheng chhe tak kara helho beitute zingah a tel.

Captain Lalrinawma ho hian Dachingam ramhnuai, Srinagar-ah hel pathumte hi kahhlum vek an ni.

An hel kahhlumte hi national media-te chuan  Lashkar-e-Taiba mi leh sa Suleman Shah alias 'Faizal Jatt' A++ category terrorist;  Abu Hamza alias 'Afghan' A-grade commander leh Yasir alias 'Jibran' A-grade commander-te niin an tarlang.

Kumin hian sipai huaisen chawimawina sang ber Ashok Chakra dawng tur an awm loa, Kirti Chakra dawng tura thlan pali an awm thung.

Operation Mahadev leh Operation Sindoor (thuhmun deuh tho) kumin hian liantham takin kalpui a ni chungin Kirti Chakra dawng tura thlan erawh pali chiah an awm thung. Hei hian Lalrinawma Sailo huaisen zia leh chetthat zia a tarlang awm e.

Lalrinawmate hian certifcate vel chu an dawng tawh a, medal tak erawh President of India hnen atangin November-ah an dawng dawn.

Thudawn danin, Kirti Chakra hi Indopui II lai vel khan Mizo dawng an awm tawh a, Lalrinawma Sailo hi Mizo zinga dawng thei pahnihna a ni.