Khawtlangin mibo an zawng

Ni 19.3.2023 atanga chin hriat loa bo Isak Malsawmtluanga (kum 15) s/o Ruatdika, Thenzawl Vengthar chu vawiin (21.3.2023) atangin khawtlangin an zawng.

Isak Malsawmtluanga hi ni 19.3.2023 chawhnu dar 1 vel atangin chin hriat lohin a awm a, a bo hlim leh nizan lam thleng khan chhungkhat laina, Thenzawl khawchhung YMA Branch thenkhat leh mi tlawmngaiten a bona awm nia rin Lungrang tlang lam leh hmun dangte an zawng a ni.

Hmuh a nih tak loh avangin Thenzawl Joint VC leh Joint YMA-te hmalaknain vawiin atang khan khawtlang huapa beihpui thlaka zawn hna thawh a ni a, vawiinah hmuh a nih loh chuan naktukah an zawn chhunzawm leh a ni ang.

Thenzawl atanga thudawn danin, Isak Malsawmtluangate hi Sertlangpui khuaa awm ṭhin niin, tun thla tirah Thenzawlah hian an pem a ni. Amah hi tlema mi pangngai phak zan lohna nei niin, hang lam pang, feet 5.3 vela sang a ni. A bo lai hian kawrlum polar dum ban tluan, truck kekawr pawl a ha a, chapal sen dal lam a bun nia sawi a ni.