Zirna in ngaihsak loah sorkar puh

AAP Mizoram hnuaia CYSS Zirlai Pawlte chuan vawiin (17.4.2023) chhun dar 12:30 khan Aizawl Press Club-ah press conference neiin zirna in ngaihsak loah Mizoram Sorkar an puh.

Mizoram CYSS Coordinator Vanlalthlamuanpuia chuan kum 2023-24 academic session chu April 5 ah tan ni tawh mah se, vawiin thleng hian sorkar sikul naupang tam takin zirlaibu an la dawng lo nia sawiin, 'Hetiang chian hian kum kalta pawh khan zirlaiten harsatna an tawk tawh. Sikul thenkhatah phei chuan zirtirtu thahnem ngaiten zirlaibu hlui la khawmin an sem nghe nghe,' a ti.

Vanlalthlamuanpuia chuan zirlaibu thenkhat chu bazar-ah lei tur pawh a awm lo tih sawiin, 'Tunah hian zirlaibu thenkhat phei chu printing press-ah an la print mek chauh. Sorkar hian naupangte zir tur lehkhabu leh mamawh pawh a peih hmain sikul tan hun a siam hmasa zawk,' tiin Mizoram Sorkar chetdan zirlaite leh zirna a ngaihsak ta tak lohzia leh kan hmakhua an ngaih lohzia a tilang chiang niin a sawi.

CYSS Zirlai Pawlte tarlan danin, sorkarin zirtirtu training a pe tha lo a, zirna puitu tur hmanrua pawh a pe tha lo. Khawi hmunah pawh hian zirna in chhia leh kalphung tha lo chu sorkar sikul an ni vek.