Chempui nen Treasury luhchilh

Vawiin (30.1.2024) chawhma dar 10 vel khan mi pakhatin chempui nen Aizawl South Treasury a luhchilh a, harsatna liantham erawh a thlen lo. 

Bengvarna thudawn danin, chempui nena lut hian pension hlawh an lak loh avanga an harsat thu leh Treasury Officer a hmuh duh thu a sawi a, Treasury Officer a awm loh thua lo chhangin pension branch lama kal turin an lo ti. Pension branch hi Treasury-a branch pakhat a ni a, building leh floor khat vekah Treasury Officer-te nen an awm. 

Pension branch lama a kal hnuah chempui a phawrh a, thawktute chu chhuak turin a hriattir. Thawktute chuan November-ah i inlan lo a ni ang an lo ti a, inlan a ngaihve loh thu leh thildangin a chhang. An lo biak buai laiin helai building-a police duty-te chuan an man. 

Pensioner-te hi kumtin November-ah an la dam ngei tih finfiahna atan leh thildang atan Treasury-ah an inlan a ngai thin. An inlan loh chuan hlawh siam sak an ni ngai lo. 

Tun dinhmunah December, 2023 pension hlawh pek tawh a ni a, January 2024 hlawh chu pek a la hun lo thung.