Assam thuneitute'n remti lo

Langkaih Group YMA chuan vawiin (6.2.2024) hian Zaite, Assam-ah rorel inkhawm an nei a, zana kumpuan hawn inkhawm an buatsaih tum chu an kaltlangpui thei lo maithei.

Langkaih Group YMA hruaitute hnen atanga thudawn danin, Zaite leh a chhehvelah hian Zohnahthlak unauten YMA dinin, branch paruk a awm. Kumin rorel inkhawm chu Zaiteah hian neih tura rel a ni angin, vawiin khan neih a ni.

Zaite Branch YMA hruaitute chu an thil tih tur thuneitute lo hrilh lawk tura tih an ni a, mahse anni lam hian an lo hrilh lawk lo. Heivang hian Assam Police-te chu an rorelna hmunah hian an kal a, harsatna liantham awm loin ro erawh an rel zo thei.

Hetihlai hian Mizoram atanga Zaite hmuna kal turte chu Assam Police-in an ram chinah an lo dang tawh a, zan hun hmanna-a kal tumte an kal thei tawh lo.

Zanin kumpuan hawnnaah hian Hachhek Bialtu MLA Robert Romawia Royte sawm a ni a, tun dinhmunah chuan helai district (Assam) thuneitute'n a kal an remti lo.

Robert Romawia hian Zaite Bialtu MLA biain a programme a hrilh a, MLA hian remti mah se, district thuneituten he thuziahlai thleng hi chuan an la rem ti lo. Robert Romawia hian zan hun a hmanpui thei dawn em hriat a la ni lo.

Langkaih Group YMA hruaitute chuan tunhma deuha buaina a lo awm tawh avangin Assam thuneitute an fimkhur a nih an rin thu sawiin, 'Zaite YMA lamin an lo hrilh lawk loa, a pawi tak tak,' an ti.