Savawm kah a nih ring

Dy. Conservator of Forest, Aizawl Wildlife Division chuan circular ti chhuakin Aizawl Zoological Park atanga savawm chhuak chu kah ni ngeia hriat a nih thu leh pawikhawihna hmuna thisen chu savawm thisen a ni ngei em tih hriatna atan laboratory-a endik tura thawn a nih thu a tarlang.

Dy. Conservator of Forest circular

Ni 12.04.2024 a thuchhuah kan siam tawh ang khan Aizawl Zoological Park atanga Savawm chhuak chu Zoo area pawn lamah a awm tawh tih kan inhriattir chu, a hnu chhui zui zel a ni a. Ni 20.04.2024 (Inrinni) zan dar 11:00 khan Lungverh peng thlen hma tuikhawh thla bulah khuan motor tlan thla chuan a kawng kan tum chu tawkin, savawm hlauthawng chuan kawng chhak lam a pan chho leh tih report dawn a ni a, hemi zing vek dar 2:30 ahian Sairang Sihhmui Rail Station sak lai mek chhak lamah, savawm hian thawm a nei leh tih report dawn a ni.

Report bawhzui hian Forest Department, Aizawl Wildlife Division staff-te bakah hian a tuk ni 21.04.2024 (Pathianni) hian Dampa Tiger Reserve leh Thorangtlang Wildlife Sanctuary-a Wildlife Guard, ramsa zei zia hrechiang bik leh sa hnu chhui thiam bikte chahin savawm an hmu nia an sawi na laite chu luh chhuah nghalin a hnute an chhui zui nghal a ni. Hemi ni hian amah tak hmuh nilo mahse a hnu thar ni ngeia hriatte chu Lungverh peng thlen hma tuikhawh thla chhak lam ramah hian hmuh a ni.

Tichuan ni 22.04.2024 pawh hian nilengin chhui zui zel niin, tlai dar 5:30 pm khan savawm hnu an chhui tawp na ramah hian savawm thang (trap) kam tum a staff te an inbuatsaih mek lai in mau hmun ah thisen bua hmuh a ni ta a, a sirah hnang hlai nate hmuh niin savawm hi kah a nih rinna lian tak neih a ni a, hemi zan vek hian staff te chuan thisen an hmuh na lai ram hi kal khan hrang hrang ah changin tlaivarin an hual a, staff thenkhat in a chhungah luhchilhin an dap chhuak nghal vek bawk mahse a sa emaw a sa channa ni awm engmah hnuhma emaw hmun a ni lo a mihring rinhleh tur pawh tumah man chhuah an ni lo. Hemi chungchangah hian Sairang Police Station ah FIR thehluh ani tawh.

Pawikhawihna hmuna thisen hmuhte hi MZU Bio-tech Laboratory-ah finfiah tura pek tawh a ni, mau a thisen kai hi mihring kut atanga kai nia rinhlelh a ni a, hei avang hian Forensic FSL Science Laboratory lamah Finger Print Analysis tih nghal bawk a ni.

Hengte a nih avang hian savawm hnu hi staff ten ngawrh takin an la chhui zui zel a, DNA test result nghah mek hi a result a zirin hma lak dan tur rel thar leh tur a ni ang.

Zoo atanga savawm chhuak hi a thawm emaw lo hmu kan awm a nih chuan a rang lama Forest Department Officials te hriattir turin mipuite kan ngen nawn leh a ni. Tin, Wildlife (Protection) Act, 1972 hnuaiah Savawm te hi Schedule -I ah dah an nih angin a lo kap emaw a sa lo chan kan awm a nih chuan an chungah dan anga hma lak a ni ang tih kan in hriattir a ni e. WPA, 1972 Section 51 in a sawi angin lo ti hlum emaw a sa lo chan an awm anih chuan kum 3 atanga kum 7 thleng lungin tan theihna a ni tih kan in hriattir leh bawk e.