ZPM-in lungrem chim enfiah
admin 21-May-2024 05:54 PMZPM chuan thuchhuah siamin, tun hnaia Reiek RD Block BDO Complex retaining wall (hungrem) hnathawh chim enfiah turinendiktu team siamin a hmunah an kala, thil awmdan an zirchiang nghal thu an tarlang.
ZPM thuchhuah tarlan danin, endiktu team hian Reiek RD Block BDO Lalrinzuali leh office technician-te an kawm. Anni chuan, he hna hming hi BDO Complex Retaining Wall, PMKSY hna RD Department hnuaia ZPM Reiek Unit President Zothansanga hminga thawh a nih thu te, a sanction amount hi Rs.1,00,000 a nih thute leh hei hi SOR 2019 hmanga estimate siam a nih thute an sawi.
BDO Lalrinzuali chuan, 'Retaining wall chim chhan hi hnathawh chhiat vang a ni lo. March 23,2024 khan he hna hi zawhfel a ni a, zawhfel a nih hnu hian a khat tawkin ruah a sur fo a, lungremna lai leilung hi leivung awmna lai niin a lei a nghet lo sa hrim hrim. May 6, 2024 khan he retaining Wall hi a chim ta a, pawi kan ti hle a, hnatawh chhiat vangah kan ngai lova, vanduai vang ah BDO Office lam chuan kan ngai a ni. Chuvangin keini lam pawhin a khuhna tur silpauline pein Water Shed Development Fund atangin lungrem chim siamthatna tur kan dil sak mek a ni,' a ti.
Hna thawktute lam pawhin thil awm dan sawiin, 'Ruahtui tlak vang leh a chhaka water tank siam thar atang hian tui a put niin kan hria a, he hna leh sum sanction amount hi inmil lo deuh niin kan hre bawk. Theihtawpa kan uluk chung pawha hetiang thil a thleng hi pawi kan tih hle,' tiin hnatlanga siam that leh hial pawh an tum laiin, BDO hian Water Shed Development Fund atanga a siamthatna tur a lo ngaihtuah sak avanga an lawmthu an sawi.
ZPM chuan endiktute hmuh dan chuan, he hna hi SOR 2019 hmanga estimate siam a ni hi tha lo an ti a, dan thar anga 33.03% belh ni sela chuan, lung rem hi a thuahin a rem theih dawna, retaining wall 28 ft a sei,12ft a sang rem nan chuan estimate hi a leilung awmdan enin a tlem deuh nia an ngaih thu an sawi tih an tarlang a, 'Budget mila hna thawh angaih avangin he retaining wall hi a thuah a rem a ni lo. Hei vang hian retaining wall hi chak tawk lo niin an hria, estimate siam dan hi ennawn turin department hotute hnenah pawh thlen an tum nghe nghe a ni,' an ti.