ZPM-in general consent an sawifiah

ZPM Legal Department chuan vawiin (8.7.2024) hian an party office-ah press conference neiin, Mizoram Sorkarin Central Bureau of Investigation (CBI) hnena general consent a pek nawn chungchang an sawifiah.

ZPM Legal Department hotute sawi danin, ZPM kaihhruai sorkar chuan a intiam ang ngeiin December 12, 2023 khan CBI hnenah general consent a pe a ni. Parliament-in a pass tawh criminal law pathum July 1, 2024-a hman tan tura  a nih avang leh dan thar hman a nih dawn avangin CBI Director chuan Chief Secretary hnenah Mizoram sorkarin CBI general consent a lo pek tawh chu July 1, 2024 hma ngeia gazette notification ti chhuak turin a rawn thlen. 

CBI-in notification thar siam tura a ngenna chhan chu Mizoram sorkarin CBI hnena general consent a pekna chu section 3 of Delhi Special Establishment Act, 1946 (DSPE Act) hnuaia central sorkarin IPC hnuaia thilsual tihnate chhui theihna chauh a nih vang a ni.

Dan thar hman a nih tak avangin Mizoram sorkar hian a thar hlaka notification chhuahin, CBI hnenah general consent a pek thar a ngai. Anih loh chuan CBI-te'n dan thar hnuaiah Mizoramah thil an chhui thei dawn lo. CBI-in instruction a tih ang thlapin general consent hi pek thar leh a ni. A hma-a pek tawh hnuhkir a ni tihna a ni lo. Duh duha state sorkar rawn loa thubuai chhui turin CBI-te hi tih ngawt theih an ni lo.

ZPM Legal Dept. hotute chuan dan kan sawi dawn chuan a zawmpui dan dang hriat tel a ngai tih sawiin, 'Chumi ngaihtuah lo leh hre si loa, dan pakhatin a sawi lai chauh lak vung vak hian mipui a hruai sual thei. Thudik famkim lo sawi a awl viau. Tute emaw anga, Bible chang duh lai lak chhuah ang deuh nen pawh hian a in ang thei hle awm e,' an ti.