A tum khatnaah pakhatna

MPSC-in zanin (30.4.2025) a Combined Competitive Examination result a ti chhuah taka pakhatna Samuel Malsawmzuala (27) s/o JH Laldingliana, Serchhip Tuikhuah Veng chu HSLC, HSSLC, BA leh MA-ah pawh a ti tha thin hle.

Samuel-a hian Marian High School, Serchhip atangin HSLC a pass a, Mizoramah palina a ni. HSSLC chu St. Pauls HSS atanga pass-in science stream-ah pahnihna niin, BA-ah erawh arts-ah in letin PUC atangin economics subject-ah topper a ni thei. MA chu University of Hyderabad-ah kalin, hnamdang karah pawh a duai lo hle a, economics-ah an university topper a ni.

MA a zawh hnuah Delhi-ah coaching kalin, nikum khan Mizoramah a rawn let a, MPSC hnuaia Combined Competitive Exam a hmachhawn hmasak berah pakhatna a ni.