Mipa kan tan a tul - Lalhmachhuana

LBS Suzuki 22nd Inter Branch YMA Football Tournament 2025 chu Thawhlehni (29.4.2025) zan khan CYMA Hall, Tuikhuahtlangah CYMA President Lalhmachhuana'n a pet hawng a, mipa tan a tul thu a sawi.

CYMA President chuan, "YMA hian kum 1935-a a din tirh aṭangin thil ṭha tam tak a lo ti tawh ṭhin. Vawiin thleng hian Zofate hmasawnna turin ke a pen a ni. YMA thil tum pathum zinga pakhat chu Zofate hmasawnna ngaihtuah a ni a, kawng hrang hrangin Zofate hmasawnna tur hi a ngaihtuah a, a thawk bawk a, a ti bawk a ni," a ti.

Mizo mipa chungchang sawi chhunzawmin CYMA President chuan, "Voter list kan en chuan mipa aiin hmeichhia hi 25,000 chuangin an tam daih tawh. Khawiah nge mipate hi kan tam ve le tih hi inngaihtuah chiang teh ang u. De-addiction Centre-ah chuan mipa deuh hlir, khawlaia spot kan tih leh vei vak mai mai, tih tur nei lo tlan kual mai maiah hmeichhia aiin mipa kan tam zawk bawk. Kan tamna tam zawk hi a ṭha lo lam a ni," tiin mipate a ṭha lama hmasawn a ngaih thu a sawi.