CM thusawi man fuh loah puh

ZPM Spokesperson K Laltluangkima chuan vawiin (30.9.2024) khan Aizawl Press Club-ah thuthar thehdarhtute kawmin, MCS khawmpuia Chief Minister Lalduhoma thusawi man fuh loah MNG General Secretary K Lalsawmvela, PWD Engineer-in-Chief hlui a puh.

K Laltluangkima chuan ni 20.9.2024 khan kan Chief Minister chuan MSC khawmpuiah kan rama hna tha taka kan thawh theih nan contract agreement tha kan neih a pawimawh thu a sawi tih sawiin, 'Chuta a thusawi chu ni 24.9.24 khan MNF lamin an rawn chhang let. MNF GS K Lalsawmvela chuan press conference hial koin CM chu MCS Association Conference-ah thu dik tawk lo sawiah a puh. CM thusawi hi a man fuhlo deuh niin a lang. Finfiah dawl si lo, sawi fiah ngai a tam ta em em mai hi ZPM chuan pawi a ti takzet a ni,' a ti.

ZPM Spokesperson sawi danin, Sadguru Engineers & Allied Services Pvt. Ltd.-te'n Bairabi Railway Station to Bilkhawthlir, Bilkhawthlir to Kolasib leh Kawnpui to Khamrang kawng an siam a ni .K Lalsawmvela hian, Kawnpui to Khamrang kawngte hi EPC Mode contract hmanga agreement siam an nih thu tarlangin, PWD mawhphurhna chu a rawn sawi bo titih a, EPC contract agreement hmang chuan April ni 19, 2021 khan agreement chu ziak ngei a ni. Agreement signtute chu - Ministry of Road Transport & Highways (MoRTH) aiawhin Mizoram PWD Chief Engineer (Highways) leh Sadguru Company-te an ni. Amaherawhchu EPC contract agreement kalphunga la awm ngai lo a lo inzep nual. 

ZPM Spokesperson sawi dangte :

1) Kawnpui to Khamrang kawng kms. 15 a sei hi, work order kan tih mai, LOA – Letter of Acceptance chu, sorkar khan January 25, 2021 khan a pe. LOA ah hian contractor-te hian contract agreement hi ni 30 chhungin an sign fel tur a ni, tih chiang takin a inziak. Contract agreement sign fel tur hian performance security Rs. 35,37,000 an dah nghal tur a ni tih a ni. Ni 30 chhunga contract agreement an sign hman loh chuan extension an dil thei a, ni 60 chhung chuan contract agreement an sign fel ngei ngei tur a ni tih a ni. Ni 60 chhunga agreement an sign hman loh chuan hna hi pek loh tur an ni a, tender an chhan laia bid security kha an chan vek tur a ni. Amaherawhchu Sadguru te hian dan an bawhpelh nasa hle a, contract agreement hi work order/LOA an hmuh ni aṭanga a ni 80 zet, April 19, 2021-ah an sign chauh.

2) Performance security-te pawh hi EPC contract agreement danah chuan contract amount atanga 5% dah tur tih ni si, 3% chauh an lo dah. 5% chu dah se Rs. 58,95,000 a ni ang.

3) Kawnpui to Khamrang kawngah hian Contractor Sadguru-te hian hna an zawh ni, completion certificate (May 6, 2022 ah pek an ni a) an neih ni atangin kum 3 chhung (May 6, 2025) kawng hi an enkawlzui zel ang a, a chhe lai siam thain an maintain zel tur a ni, tih a ni. Chumi hun chhung chu defect liability period an tii. Mah se, defect liability period chhunga kawng siam nana sum awm zat chu cheng uai 12.54 chauh a ni si. Heti zat lek kawng repair-na atana sum a awm hi kan CM khan tlem a tihzia a sawi lang a nih kha. Hei hi a tlemna chhan chu, kawng repair-na atana hman turin contract agreement-ah 'contract amount atangin 1% chauh a ni ang', tih a lo dah vang a ni. ( Helai 1% hi K Lalsawmvela hian a Press Conference ah khan 1% hi EPC guidelines ang a ni a, contractor duhsak vang a ni lo, hlawkna tem ve duh vang a ni lo a ti. Mahse han bih thuk deuh chuan 1% kha an mahni state PWD lamin an rawt (propose) a ni lawi si.)

4) Defect liability period pawh hi EPC contract agreement ah hian kum 5 tih te kum 3 tihte a chuang a, duh zawk zawk thlan theih ang deuhin, hengte hi chiang faka ziak a nih loh vang hian Sadguru hian kum 3 zawk a thlang mai a ni. 

5) Sadguru Company-te hian, kum 3 chhung, defect liability period chhunga kawng repair leh maintenance an thawh tur kha, run dal tak tak chauhin an thawk. Vawi eng nge maw zat thawk tha tura hrilh an nih hnu pawha an awih loh zel avangin, show cause notice-te pawh pek an ni hial a,  mahse show cause notice pawh an chhang ngai lo.

6) Chutiang a nih tak avang chuan Mizoram Sorkar chuan Regional Office, MoRTH, Guwahati Office-te hriatpuinain Sadguru-te hna chu ni 4.9.2024 khan cancel tura thutlukna siam a lo ni ta a, Sadguru-te pawhin sorkar an khin zui zel loh nan leh sorkarin a khinzui loh nan, an contract tih tawpsak (foreclose) chu an lo dil ve bawk a, inhrethiam tawnin performance security Rs. 35,37,000 pawh chu Mizoram Sorkarin, kawng siam nan, an laksak (forfeit) ta a ni.