New Vervekah punkhawm khap

Aizawl District Magistrate Lalhriatpuia chuan Sinlung Hills Council (SHC), 2024 inthlana vote tlate chhiar zana Returning Officer chetdana an lungawi loh avanga mipui an punkhawm thinna, New Vervekah puipun a khap.

Aizawl District Magistrate hian Sinlung Hills Council neih tak hnuah New Vervek constituency huamchhungah boruak muanawm a awm theih nan puipun khapna thupek hi chhuahin, '2nd Sinlung Hills Council, 2024 Inthlanpui kal mek ah hmun thenkhatah harsatna a thleng tih hriat a ni. Buaina lian zawk a thlen loh nan a hnuai ami ang hian khuahkhirhna thupek chhuah a lo ngai ta,' a ti.

Aizawl District Magistrate thupek 'New Vervek Constituency huamchhung khawi hmunah pawh mi panga aia tam thuneitute phalna nei lo chu an pungkhawm tur a ni lo' tih a ni. Amaherawhchu, he khuahkhirhna hian Election Official Duty Police, armed forces, medical duty, fire service, tui sem, chanchinbu sem, bawnghnute sem, candidate leh candidate agent-te a huam lo ang.

He thupek hi tihdanglam a nih loh chuan kar hnih (2 weeks) chhung a huam ang. Thupek zawm lote chu BNS 2023 Section 223 hmangin an chungah na takin hremna lek a ni ang.

Tarlan tawh angin, SHC inthlana New Verveka vote tlate chhiar a nih tum hian RO chetdanah mipuite an lungawi loa, an pungkhawm. A tuka RO-in New Vervek a chhuahsan tur pawh dan tumin mipui an pungkhawm a ni.

Thulaknain a tarlan danin, New Vervek biala vote tla hi tum li chhiar a ni a, a hnuaia tarlan ang hi result awm dan a ni.

1. First Counting-ah vote 1-in MNF an chak

2. Second Counting-ah Vote 7-in ZPM an chak

3. Third Counting-ah vote 15-in ZPM an chak

4. Fourth Counting-ah 12 vote-in ZPM an chak 

Thlalak : SHC inthlana vote tlate chhiar tukah RO chhuak tur dang turin New Vervekah mipui an pungkhawm