Ruihhlo do beihpui thlak tan

Tukin (9.11.2024) khan Kawn Veng Welfare, Chhiahtlang leh All NGOs huaihawtin ruihhlo do beihpui thlak tanna hun Chhiahtlang Bazar-ah neih a ni a, mipui kal khawmten an veng chhunga zu leh ruihhlo zawrh an duh lohzia an lantir.

He hun hi Kawn Veng Welfare Committee (KWC) Chairman R. Lalremchhungan a kaihruaia, Pastor C Lalsanglura (Chhiahtlang Kawn Veng Bialtu) leh Chhiahtlang South VCP K Lalbiakmawia ten thu an sawi a. 

Mipui kalkhawmte ruihhlo dona lam thuziak keng chungin an au rual a; khawtlang tihnawktu zu leh ruihhlo zuar thinten sim a zuar tawh lo tura an duh thu te; zu leh ruihhlo an do zel dawn thu te, khawtlang ngenna zah lo chuan veng chhung chhuahsan tura an duh thu te, ram leh hnam hmelma zu leh ruihhlo zuar an mamawh loh thute leh sawrkar phal loh zuartute chu na taka hrem an phut thu te in an au rual a ni.

Kawn Veng Welfare, Chhiahtlang hma lakna hi a bul tanna chauh a ni a, veng chhunga zu leh ruihhlo zuar lui zel an awm chuan na zawka hma lak chhoh zel an tum.