Pukah ruhro thahnem tak an hmu

North Khawlek, Saitual District mite chuan an khaw ram chhung kham kara pukah mihring ruhro ni ngeia hriat thahnem tak an hmu. 

Bengvarna thudawn danin, North Khawlek mi ramvakte chuan ruhro hi kar hmasa lam khan an hmu a, YMA hruaitute an hrilh a ni. YMA lam hian Village Council-te hriattir velehin, va enchian hun tur an ruat. 

Enchian hun tura an ruatah an khawtlangin chhiat an tawh vangin vawiin (17.2.2025) chhun khan an enfiah ta a ni. Ruhro an hmuhna puk hi kal pawh harsa tak a ni a, tunhmain a awm tih an hre ngai lo. 

A luhna chu feet thum leh a chanve vela zau, feet ruk vela sang niin, feet 38 vela sei a ni. A zuih zawnga awmin, a tawp lam chu feet khat vel chauha zau a ni. 

Puk laihawl velah lu ruhro pakhat hmuin, lung thil an hainaah ruhro hi an hmuh belh zel a ni. Luruh hi a keh deuh nual tawh avangin a zat chiah hriat theih a ni loa, mi pariat atanga 10 vel luruhah an ngai.