Meriam-i chanchin tlangpui

Nimin (March 8, 2025) a Confederation of All India Traders (CAIT) & Association of Direct Selling Entities of India (ADSEI) buatsaiha Indira Gandhi Stadium, Delhi-ah International Women's Day puala 'Women Entrepreneurship Summit 2025' hmanna a, Lifetime Achievement Award dawngtu Meriam L Hrangchal hian Vestige Marketing Pvt. Ltd. hnuaiah kum 2014 atang khan bul a tan.

Meriam-i hi tun dinhmunah Vestige Millionaire Council member niin, North East-ah hetiang member ni thei hmasa ber leh awm chhun ni mek a ni. Tunah hian a kaihhruaina hnuaiah member 1,80,000 vel awmin, mi harsa zawk ten leirem rap ve thei turin theihtawp a chhuah zarah thlatin a hnuaia mite hian hlawh an la mek.

Vestige Company atang hian mi 50 chuangin motor an dawng tawh a chung zingah Meriam-i'n foreign car BMW a dawn leh a team zinga miin Audi a dawn chu car man to zual an ni.

Meriam L Hrangchal hi kum 25 chhung govt. middle school-ah a thawk a, headmaster dinhmunte pawh a thleng hman. Kum 2020 khan zau zawka rawng a bawl theih beiseiin a hna chu a ban san.

Thangthar tur te hmakhua ngaiin kum 2016 khan Edify Kids International Standard School dinin India rama 'Best Franchis Award' te pawh a lo dawng tawh a, a hnadangte bakah tunah hian Falklandah 'Alpha World School' ah principal a ni mek.

Tarlan tawh angin Women Entrepreneurship Summit 2025 hmannaah hian  India ram puma hmeichhe 100,catagory hrang hrang atangin pek an ni a, chung zingah chuan Lifetime Achievement Award hi chawimawina sang ber a ni.

Meriam L Hrangchal hi Northeast atanga Lifetime Achievement Award dawng pha awm chhun niin, Mizo zinga he awards dawng hmasa ber a ni.

He award hi kawng hrang hranga hmeichhiate dinhmun chawikang a, leirem rap tur a hmalatu hmeichhe hruaitu (leader) thate pek thin a ni. He summit-ah hian palai 10,000 ai tam women entrepreneur-te an kal khawm.