Mizoramah zu zawrh a ni dawn lo

Excise & Narcotics Minister Lalnghinglova Hmar chuan vawiin (10.3.2025) Assembly Session-ah zu khap burna dan siamthatna tur  'The Mizoram Liquor (Prohibition) Amendment Bill, 2025' chu a pulut a, sawiho zui nghal a ni dawn.

Lalnghinglova Hmar chuan a bill putluh chu kuthnathawktute lam tang bill a nih thu sawiin, 'Zu khap burna a ngheh lehzualna tur bill, kuthnathawktute an saltanna atanga zalenna dar vuak sakna tur a ni. Excise & Narcotics Department-a thawktute hah belhna tur bill a ni a, ka thawhpuite nen chuan kan hah sawt dawn pawhin kuthnathawktute'n an hlawkpui dawn tiin kan infuih,' a ti.

Dan hmang mekah chuan Excise Minister chuan grape atanga wine siam chhuah chiah phal a nih thu sawiin Excise Minister chuan, 'Grape chingtute kan duhsak rualin dragon fruit, lakhuihthei, kawlthei, sunhlu, balhla etc. chingtute kan hmangaiha, kan duhsak ve tho. An tharchhuah atangin wine siam ve se kan duh,' tiin beer pawh Mizoram atanga thlai thar chhuahah chuan phal a nih dawn thu a sawi.

Lalnghinglova Hmar chuan chuan 'zu an thlah zalen dawn' tite an awm tih sawiin, 'An hriatchian tawk loh vang a ni. Hriatchian hnu chuan be bill lam tang deuh vek kan nih ka ring,' a ti.

Excise Minister sawi danin, an bill putluh tur chu a lo leak out a, kohhran hruaitute pawhin an hmu a, inlengte pawh a ni. Zupui leh zutling siam phalna awm chu kohhran hruaitute'n paih an duh a, March 1, 2025-a ZPM Legislature Party inhmukhawm chuan kohhranin an duh loh chuan zupui leh zutling paih an rel a, hemi rual hian zufang siam phalna pawh paih law law rel a ni.

A senchi kap chhunzawm a nih dawn bakah, state pawn atanga beer leh wine lakluhte chu man zel an ni dawn. Mizoram chhunga thlai tharte atanga beer leh wine siam erawh phalna neite tan chuan zawrh phal a ni dawn. A duh duhin siam leh zawrh erawh phal a ni dawn chuang loa, a zuar duh leh siam duhte chuan license an neih a ngai dawn.

Dan thar duan tur hian tunhmaa a huam ngai loh autonomous district council pawh a huam tawh dawn, a senchi leh state pawn atanga beer leh wine lakluh bikah chuan. A hma aiin state pawn atanga zu, beer leh wine lakluh khap kawngah chuan a hma aiin Excise & Narcotics Department chu an tang sauh dawn.