CSS-a thawkte leh CS charge latu inkawm

All Mizoram CSS Employees Coordination Committee (AMCECC) chuan thuchhuah siamin, sorkar laka lungawi lohna lantirna atana pen/tool down strike April 15,16 leh 17, 2025 chhunga neih an tum chungchangah Mizoram Sorkar aiawh Chief Secretary charge latu H Lalengmawia hovin vawiin (14.4.2025) chawhma dar 11 khan meeting an neih thu an tarlang.

AMCECC tarlan danin meeting-ah hian pen/tool down strike neih an tum thulh turin CS charge la mektu hian a ngen a ni. AMCECC Emergency Meeting koh nghal niin, sorkar lak atangin kan thil phut tihhlawhtlinna tur engmah lungawipui tur thu an hmuhloh avangin pen/tool down strike April ni 15,16 leh 17 2025 neih an tum chu kaltlangpui tur a ni.

Mizoram Sorkar aiawh CS Charge latu hoa inbiakna an neih mek laiin Mizoram Sorkarin 'Enforcement of CSS (Conduct) Rules, 1964 and No Work No Pay, chungchang Office Memorandum (No.C.13015/4/2020-GAD Dt. 14th April, 2025) a chhuah hnan leh nghal nia tarlangin AMECC chuan, 'CSS hnuaia hnathawkte hnuaichhiahna leh vauna lian tak niah kan ngai,' an ti.

AMECC chuan pen/tool down strike neih an tum hi an tarlan tawh thin angin, Mizoram Sorkar an karna leh lungawi loh tum ngawr ngawra ni lo nia tarlangin, Mizoram Sorkar hnuaia CSS-te kan ngheh ve theihna tur dan : Govt. Of Mizoram Regularization of CSS Employees scheme, 2024  Dt. 18th June, 2024 min siam sak tawh chu a taka a hlawhtling mai tura kan beisei laia, DP&AR(ARW) atanga Office Memorandum (No.B.12018/1/2020-P&AR(ARW) Dt. 21.10.2024) chhuaka checklist in min dal leh tak tlat avanga loh theih lova sorkar kan nawr a ngai hi hrehawm kan ti,' tiin an nawrhna avanga tuartu mipuite hnenah hriatthiamna leh ngaihdamna an ngen.

===========