Khawthlabung san zawng teh

April 11, 2025 khan Zotrek Adventure Club-te chuan Teirei lui, Lallen rama tui khawhthla, Khawhthlabung san zawng an teh a, ft 253 (metre 77) a sang tih an finfiah.

Zotrek-te hian Mizorama tuikhawhthla san zawngte an lo teh fo tawh ṭhin a, la teh leh zel pawh an tum. Mizorama tuikhawhthla sang Top - 5 puan thuai tumin hma an la mek. Siaha bulah Tuikhawhthla sang tak a awm niin sawi a ni a, Mizoramaah a san ber ringte pawh an awm a, chu pawh chu Zotrekte hian teh thuai an tum niin thu kan dawng.

Zotrek Secy Makima chuan 'Lallen khawtlang hian an lui dung an humhalh ṭhain an enkawl thianghlim hle a, bawlhhlawh hmuh tur a awm lo. Mizoram mipuite hian i entawn ang u. Lui kan kalin, kan thil ken te lui dunga paih mai lovin, i hawn leh i la, bawlhhlawh bawmah i paih ṭhin ang u,'  tiin a sawi.

Zautei, Zotrek Adviser, AMC Corporator ni bawk chuan, 'Mizorama kan lui dung te leh kan thing leh mau, ramngaw leh nungchate humhalh a, a ti chhe tu ni lova, venghimtu ni ṭheuh turin Mizoram mipui te kan sawm a ni,' a ti.

Zotrek Adventure Club hi open club niin, Mizoram leh Mizoram pawn, khawi hmun aṭang pawhin adventure lama tui mi te tan Member a nih theih reng a ni. Zotrek Adventure Club hi Mizorama Adventure Club Firm & Society a registration nei awm chhun an ni.

Club hlun leh Sawrkar pawhin vawi tam tak a lo koh tawh ṭhin an ni. Mizoram tan thil ṭha leh bengvarthlak tak tak min lo hlui tawh ṭhin a, Mizoram pawn lamah pawh expedition an lo nei fo tawh ṭhin a ni.

Zotrekte hi Lallen khawtlang hruaituten an lo dawngsawng. An chungah Zotrekte an lawm takzet a ni. April  10 khan he expedition nei tur hian Aizawl an chhuahsan a, mi 40 vel an kal. Ni 12 khan Aizawl an lo thleng leh a ni.